Весела і змястоўна адзначылі свята праводзінаў адыходзячага і сустрэчы новага 2017 года ўдзельнікі ветэранскай арганізацыі Лёзненскага РЦК. Кожны з іх падрыхтаваў штосьці сваё для правядзення гэтай пераднавагодняй вечарыны. Старэйшая ўдзельніца клуба Валянціна Тарасаўна Марціновіч апранулася ва ўбор сімвала 2017 года – чырвонага Пеўня. Гаспадарлівыя жанчыны, умелыя кухаркі, прапаноўвалі сабраўшымся прыгатаваныя сваімі рукамі смачныя пачастункі. Усе з захапленнем адгадвалі зімовыя загадкі, якія падрыхтавала да свята Тамара Дзмітрыеўна Дзядкова.
У актавай зале дзіцячай школы мастацтваў, дзе праходзіла вечарына ветэранаў, гучалі сольныя і харавыя песні, ладзіліся карагоды вакол навагодняй ёлкі, праводзіліся гульні, конкурсы з уручэннем прызоў. Была адзначана адна са старэйшых удзельніц клуба Алена Пятроўна Рудабельская, якая нарадзілася ў год Пеўня.
Павіншаваць ветэранаў з Навагоддзем прыйшлі Дзядуля Мароз (Юрый Савіцкі) са Снягуркай (Марына Дзядкова), а таксама дырэктар ДШМ А. А. Барысевіч і дырэктар раённага Цэнтра культуры С. С. Піваварчык.
Усе ўдзельнікі засталіся задаволеныя, выказвалі шчырую ўдзячнасць акампаніятару А. К. Бондараву і кіраўніку хора клуба “Ветэран” Н. І. Раманьковай за вельмі ўдалае музычнае афармленне вечарыны.
У планах на бліжэйшы час у самадзейных артыстаў Народнага клуба – выступленне перад лёзненскімі гледачамі са справаздачным канцэртам (ужо ў студзені). А ў лютым яны абмяняюцца канцэртамі з аднаклубнікамі г. Дуброўна.
Яўген ДУДКІН.
Фота аўтара.
