Народны фальклорны самадзейны калектыў «Медуніца» збірае сяброў

Народны фальклорны самадзейны калектыў «Медуніца», які працуе пры ДК аграгарадка Адаменкі, добра вядомы не толькі лёзненскаму гледачу. За больш чым 20 гадоў існавання даводзілася не раз выступаць на абласных, рэспубліканскіх і нават замежных пляцоўках. Да прыкладу, калектыў з‘яўляецца пастаянным удзельнікам Горада майстроў на міжнародным фестывалі «Славянскі базар у Віцебску», фестываляў – абласнога «Грай, гармонік» і міжнародных – «Звіняць цымбалы і гармонік», масак у Латвіі г. Даўгаўпілс, прымаў удзел у рэспубліканскім фестывалі «Беларусь – мая песня» (атрымаў званне «Лаўрэат»), справаздачным канцэрце Віцебскай вобласці ў галоўнай канцэртнай зале краіны ў г. Мінску і г.д.
Пры «Медуніцы» працуе група народнай музыкі і песні «Кума», спіс узнагарод якой таксама ўражвае.
У складзе «Медуніцы» 15 удзельнікаў. Любоў да песні, да народных вытокаў з‘яднала работнікаў культуры, паштовай сувязі, бібліятэкі, сельскай і лясной гаспадарак, настаўнікаў. Кожнае выступленне для іх свята. 7 студзеня самадзейныя артысты раздзеляць яго з лёзненцамі. У раённым Доме культуры ў 14.00 адбудзецца канцэрт «Медуніца» збірае сяброў». Запрашаем усіх жадаючых. Уваход платны. Добры настрой вам гарантаваны.